|
| |
| |
শ্রী গোদ্রুম চন্দ্র ভজন উপদেশ  |
| শ্রীল ভক্তিবিনোদ ঠাকুর |
| भाषा: हिन्दी | English | தமிழ் | ಕನ್ನಡ | മലയാളം | తెలుగు | ગુજરાતી | বাংলা | ଓଡ଼ିଆ | ਗੁਰਮੁਖੀ | |
| |
| |
যদি তে হরিপাদসরোজসুধা
রসপানপরং হৃদযং সততম্
পরিহৃত্য গৃহং কলিভাবমযং
ভজ গোদ্রুমকাননকুঞ্জবিধুম্॥1॥ |
| |
| |
ধনযৌবনজীবনরাজ্যসুখং
ন হি নিত্যমনুক্ষণনাশপরম্
ত্যজ গ্রাম্যকথাসকলং বিফলং
ভজ গোদ্রুমকাননকুঞ্জবিধুম্॥2॥ |
| |
| |
রমণীজনসঙ্গসুখং চ সখে
চরমে ভযদং পুরুষার্থহরম্
হরিনামসুধারসমত্তমতির্
ভজ গোদ্রুমকাননকুঞ্জবিধুম্॥3॥ |
| |
| |
জডকাব্যরসো ন হি কাব্যরসঃ
কলিপাবনগৌররসো হি রসঃ
অলমন্যকথাদ্যনুশীলনযা
ভজ গোদ্রুমকাননকুঞ্জবিধুম্॥4॥ |
| |
| |
বৃষভানুসুতান্বিতবামতনুং
যমুনাতটনাগরনন্দসুতম্
মুরলীকলগীতবিনোদপরং
ভজ গোদ্রুমকাননকুঞ্জবিধুম্॥5॥ |
| |
| |
হরিকীর্তনমধ্যগতং স্বজনৈঃ
পরিবেষ্টিতজাম্বুনদাভহরিম্
নিজগৌডজনৈককৃপাজলধিং
ভজ গোদ্রুমকাননকুঞ্জবিধুম্॥6॥ |
| |
| |
গিরিরাজসুতাপরিবীতগৃহং
নবখণ্ডপতিং যতিচিত্তহরম্
সুরসঙ্ঘনুতং প্রিযযা সহিতং
ভজ গোদ্রুমকাননকুঞ্জবিধুম্॥7॥ |
| |
| |
কলিকুক্কুরমুদ্গরভাবধরং
হরিনামমহৌষধদানপরম্
পতিতার্তদযার্দ্রসুমূর্তিধরং
ভজ গোদ্রুমকাননকুঞ্জবিধুম্॥8॥ |
| |
| |
রিপুবান্ধবভেদবিহীনদযা
যদভীক্ষ্নমুদেতি মুখাব্জততৌ
তমকৃষ্ণমিহ ব্রজরাজসুতং
ভজ গোদ্রুমকাননকুঞ্জবিধুম্॥9॥ |
| |
| |
ইহ চোপনিষত্পরিগীতবিভুর্
দ্বিজরাজসুতঃ পুরটাভহরিঃ
নিজধামনি খেলতি বন্ধুযুতো
ভজ গোদ্রুমকাননকুঞ্জবিধুম্॥10॥ |
| |
| |
অবতারবরং পরিপূর্ণকলং
পরতত্ত্বমিহাত্মবিলাসমযম্
ব্রজধামরসাম্বুধিগুপ্তরসং
ভজ গোদ্রুমকাননকুঞ্জবিধুম্॥11॥ |
| |
| |
শ্রুতিবর্ণধনাদি ন যস্য কৃপা
জননে বলবদ্ভজনেন বিনা
তমহৈতুকভাবপথা হি সখে
ভজ গোদ্রুমকাননকুঞ্জবিধুম্॥12॥ |
| |
| |
অপি নক্রগতৌ হ্রদমধ্যগতং
কমমোচযদার্তজনং তমজম্
অবিচিন্ত্যবলং শিবকল্পতরুং
ভজ গোদ্রুমকাননকুঞ্জবিধুম্॥13॥ |
| |
| |
সুরভীন্দ্রতপঃপরিতুষ্টমনা
বরবর্ণধরো হরিরাবিরভূত্
তমজস্রসুখং মুনিধৈর্যহরং
ভজ গোদ্রুমকাননকুঞ্জবিধুম্॥14॥ |
| |
| |
অভিলাষচযং তদভেদধিযম্
অশুভং চ শুভং ত্যজ সর্বমিদম্
অনুকূলতযা প্রিযসেবনযা
ভজ গোদ্রুমকাননকুঞ্জবিধুম্॥15॥ |
| |
| |
হরিসেবকসেবনধর্মপরো
হরিনামরসামৃতপানরতঃ
নতিদৈন্যদযাপরমানযুতো
ভজ গোদ্রুমকাননকুঞ্জবিধুম্॥16॥ |
| |
| |
বদ যাদব মাধব কৃষ্ণ হরে
বদ রাম জনার্দন কেশব হে
বৃষভানুসুতাপ্রিযনাথ সদা
ভজ গোদ্রুমকাননকুঞ্জবিধুম্॥17॥ |
| |
| |
বদ যামুনতীরবনাদ্রিপতে
বদ গোকুলকাননপুঞ্জরবে
বদ রাসরসাযন গৌরহরে
ভজ গোদ্রুমকাননকুঞ্জবিধুম্॥18॥ |
| |
| |
চল গৌরবনং নবখণ্ডমযং
পঠ গৌরহরেশ্চরিতানি মুদা
লুঠ গৌরপদাঙ্কিতগাঙ্গতটং
ভজ গোদ্রুমকাননকুঞ্জবিধুম্॥19॥ |
| |
| |
স্মর গৌরগদাধরকেলিকলাং
ভব গৌরগদাধরপক্ষচরঃ
শৃণু গৌরগদাধরচারুকথাং
ভজ গোদ্রুমকাননকুঞ্জবিধুম্॥20॥ |
| |
| |
| |
| हरे कृष्ण हरे कृष्ण कृष्ण कृष्ण हरे हरे। हरे राम हरे राम राम राम हरे हरे॥ हरे कृष्ण हरे कृष्ण कृष्ण कृष्ण हरे हरे। हरे राम हरे राम राम राम हरे हरे॥हरे कृष्ण हरे कृष्ण कृष्ण कृष्ण हरे हरे। हरे राम हरे राम राम राम हरे हरे॥ |
| |
| |
|