जनमेजय उवाच
आपगेयं महात्मानं भीष्मं शस्त्रभृतां वरम्।
पितामहं भारतानां ध्वजं सर्वमहीक्षिताम्॥ १॥
बृहस्पतिसमं बुद्धॺा क्षमया पृथिवीसमम्।
समुद्रमिव गाम्भीर्ये हिमवन्तमिव स्थिरम्॥ २॥
प्रजापतिमिवौदार्ये तेजसा भास्करोपमम्।
महेन्द्रमिव शत्रूणां ध्वंसनं शरवृष्टिभि:॥ ३॥
रणयज्ञे प्रवितते सुभीमे लोमहर्षणे।
दीक्षितं चिररात्राय श्रुत्वा तत्र युधिष्ठिर:॥ ४॥
किमब्रवीन्महाबाहु: सर्वशस्त्रभृतां वर:।
भीमसेनार्जुनौ वापि कृष्णो वा प्रत्यभाषत॥ ५॥