युधिष्ठिरेणैवमुक्ता कुन्त्या चाङ्केऽधिरोपिता।
भीमार्जुनान्तरगता यमाभ्यां च पुरस्कृता॥
तिर्यग् युधिष्ठिरे याति हिडिम्बा भीमगामिनी।
शालिहोत्रसरो रम्यमासेदुस्ते जलार्थिन:॥
तत् तथेति प्रतिज्ञाय हिडिम्बा राक्षसी तदा।
वनस्पतितलं गत्वा परिमृज्य गृहं यथा॥
पाण्डवानां च वासं सा कृत्वा पर्णमयं तथा।
आत्मनश्च तथा कुन्त्या एकोद्देशे चकार सा॥
पाण्डवास्तु तत: स्नात्वा शुद्धा: संध्यामुपास्य च।
तृषिता: क्षुत्पिपासार्ता जलमात्रेण वर्तयन्॥
शालिहोत्रस्ततो ज्ञात्वा क्षुधार्तान् पाण्डवांस्तदा।
मनसा चिन्तयामास पानीयं भोजनं महत्।
ततस्ते पाण्डवा: सर्वे विश्रान्ता: पृथया सह॥
यथा जतुगृहे वृत्तं राक्षसेन कृतं च यत्।
कृत्वा कथा बहुविधा: कथान्ते पाण्डुनन्दनम्॥
कुन्तिराजसुता वाक्यं भीमसेनमथाब्रवीत्॥