तस्माज्जज्ञे महाबाहुर्भीमो भीमपराक्रम:।
तमप्यतिबलं जातं वागुवाचाशरीरिणी॥ १४॥
सर्वेषां बलिनां श्रेष्ठो जातोऽयमिति भारत।
इदमत्यद्‍भुतं चासीज्जातमात्रे वृकोदरे॥ १५॥
यदङ्कात् पतितो मातु: शिलां गात्रैर्व्यचूर्णयत् ।
(कुन्ती तु सह पुत्रेण यात्वा सुरुचिरं सर:।
स्नात्वा तु सुतमादाय दशमेऽहनि यादवी॥
दैवतान्यर्चयिष्यन्ती निर्जगामाश्रमात् पृथा।
शैलाभ्याशेन गच्छन्त्यास्तदा भरतसत्तम॥
निश्चक्राम महान् व्याघ्रो जिघांसन् गिरिगह्वरात्॥
तमापतन्तं शार्दूलं विकृष्याथ कुरूत्तम:।
निर्बिभेद शरै: पाण्डुस्त्रिभिस्त्रिदशविक्रम:॥
नादेन महता तां तु पूरयन्तं गिरेर्गुहाम्।)
कुन्ती व्याघ्रभयोद्विग्ना सहसोत्पतिता किल॥ १६॥